عمتى حبيبتى

عمتى حبيبتى اللى من لحمى ودمى زى مابيقولوا ،دى بقى ليها سوابق كتير أوى فى التخميس (الخمسه وخميسه يعنى)واخفاء أى خبر كويس عننا  لحد ماتحصل مصيبه تؤدى الى الغاء الخبر الكويس فتقوم عمتى الحبيبه تحكى الخبر الكويس مع الخبر السىء عشان تكون قال يعنى ماخبتش عننا حاجه وعشان تحسسنا اننا جزء لايتجزأ من قلبها النونو الرهيف

يعنى مثلا وابنها بيتجوز قالتلنا انه مش هيعمل شهر عسل وهيخلصوا الفرح ويرجعوا بيتهم عشان تجهيز الشقه خلص على القرشين اللى معاه ومبقاش متبقى فلوس تسمحلهم بالسفر واكتشفنا لاحقا وبمحض الصدفه ان ابن عمتى العزيز سافر يعسل فى أفخم فنادق الغردقه أسبوووووعين كاملين

وبعد شهور طويله من جوازه لقيت عمتى بتحكيلنا ان مرات ابنها كانت حامل وسقطت شوفتوا الطيبه أهى حكيتلنا ان كان فيه حمل لكن بعد اييييييييييه بعد ما مرات ابنها سقطت مش بقولكم قلبها رهيف؟

وتعدى الأيام ياحبايبى الحلوين ونكتشف بمحض الصدفه برده ان مرات ابن عمتى حامل تانى مع انى الليله اللى قبل ما أقابل ابن عمتى وأعرف منه ان مراته حامل كنت مكلمه عمتى مكالمه طويييييييييله وافتكر أخر كلمه قالتهالى فى المكالمه ان مبقاش فيه حاجه فى الحياه تفرح قلب البنى أدم مننا ومجابتش خالص سيره ان مرات ابنها حامل وكأنه خبر هامشى مش مهم وكأنها مقالتش انه جاب علبه جبنه نستو من البقال مثلا

الرائع فى شخصيه عمتى بقى انها قريبه من كل الناس وتحسسكم كده وأنتوا قاعدين معاها بأنها منكم وعليكم كده متتخيلوش للحظه انها خبيثه الا لما تشوفوا عمايلها السودا

أنا واثقه ان عائلاتكم مليانه ناس زى عمتى كده ،بس كنت هتنقط لو مفضفضتش فقولت أخرج الكام كلمه اللى محشورين فقلبى
وقال على رأى المثل(الأقارب عقارب)