افرسيهم ومتناميش مفروسه

الفيس بوك...مصيبه من مصايب الزمن يتجمع عليه بقدره قادرالأصحاب اللى منعرفش عنهم حاجه من أيام الهكسوس (ابتدائى واعدادى وثانوى والجامعه كمان)ده غير الأصحاب اللى نعرفهم عن طريق معارفنا والأقارب طبعا وأى حد كلمناه على وجه الأرض تلاقيه موجودعالفيس بوك

أصبح الفيس بوك فى حياتى يشبه كرتونه مليانه مصايب كل مفتحها تطلعلى مصيبه

المصايب هى جواز دى و خطوبه دى و كتب كتاب دى والمصيبه العظمى ان دول كل البنات اللى عرفتهم فحياتى ...الاقيهم بيتسحبوا كده للجواز واحده ورا التانيه وأنا قاعده أنِش لاعريس ولاخطيب ولاحبيب ولاجوز ولا حتى زبال يحبنى أو يحلم بيا (زى تايتانيك كده لما جاك كان جربوع وحب روز من أول نظره بالرغم من انها بالنسبه ليه حلم صعب الوصول اليه)طبعا مفيش وجه للمقارنه بين جاك والزبال وياريت كل الزبالين جاك كانت حياتنا اختلفت(ده حتى الزبالين اختفوا مع وجود عربيات الزباله الانيقه اللى بتشتغل تيموتيكى تيموتيكى)

تبدأ الرحله السوداء لما أفتح الفيس بوك وأقلب فيه وملاقيش أى جديد فيرتاح بالى (الحمد لله مفيش جواز ولا حب جديد والأوضاع مستقره)وفجأه الاقى واحده من صحباتى حاطه صوره ولد حاضن بنت (يبتدى ساعتها الفار يلعب فعبى)أبتدى أشك ان فيه حدث سعيد عالأبواب ودى أتعس لحظات حياتى (أنا مبؤرش أنا بنوء بس)

بعد كام يوم من صوره الحضن يبتدى الموضوع يتطور ونلاقى صوره قلب أحمر مكتوب جواه I love you

وكام يوم كمان ونلاقى محطوط صوره البروفايل بتاع صاحبتنا عباره عن دبلتين

ويومين كده ونلاقى فيديو يوتيوب لأغنيه رومانسيه والأخت المسهوكه كاتبه كوبليه من الأغنيه فوق الفيديو(على أساس ان ده الجزء اللى بيعبر عن حالتها فى الوقت الحالى)

وفجأه تحصل الطامه الكبرى لما الاقى صوره البروفايل بتاعه صاحبتى اتحولت ل(Just married)

أبتدى أهرى وأنكت فى نفسى وأتغاظ واشمعنى هى اتجوزت وأنا لأ؟هى أحلى منى؟ولا أحسن منى؟ولافيها ايه زياده عنى؟دى حتى وحشه ومسلوعه (رفيعه أوى)وحوله ودمها تقيل...وأفضل أعدد فى المصايب اللى فيها عشان أقنع نفسى انها اتجوزت بمحض الصدفه  بالرغم من انها مفيهاش أى مميزات (شويه غل وحقد من المفيد اللى عندنا ده ميضرش صح؟)هو غل كتييييييييييييييييير أه بس أهو ميضرش أهو ننفس عن نفسنا بدل منفرقع أو نطرقع من جنابنا

المهم قررت  أنا بقى بدل مهرى وأنكت فى نفسى  انى أستخدم ذكاء الساحره الشريره(قصدى الأنثى)عشان أغيظ كل اللى غاظونى عملا بنظريه(غيظتونى بفرحُكُم وبكره أذلكم)

النظريه دى بقى من تأليفى واختراعى عشان أنا للأسف تبع حزب الساحرات الشريرات (الأنثى)وللأسف كمان انى عارفه اننا كلنا (وخدوا بالكم من كلنا دى)سوااااااااااد ومفيش أنثى بتحب التانيه أبدا(أصحابى وحبايبى أه...حلوين مع بعض أه...نهزر ونخرج ونتكلم فى التليفون بالساعات اه....لكن تبقوا أحسن منى أو تحصلكم حاجات احسن من اللى بتحصلى يبقى لا لا لا والف لا وكده ممكن نخسر بعض)

وعملا بالمبدأ ده قررت أعمل اللى يفرس كل اللى فرسونى بجوازهم أو خطوبتهم وقررت أفرسهم بس بطريقتى الخاصه 

طبعا كل اللى متجوزين أو مخطوبين بيبصوا بنظره دونيه لكل اللى متجوزتش أو متخطبتش وكأننا زنوج أمريكا مثلا

وبيحسوا انهم أحسن مننا والدليل هو ارتباطهم وانهم لقوا حد يبصلهم ويتجوزهم (واحنا لأ)

لكن لوفكرت صاحبتهم اللى مرتبطتش دى انها ترتبط تبدأ المقارنات تبقى على أشدها((جوزى احلى ولا خطيبها؟جوزى مرتبه أكبر ولامرتب خطيبها؟ جوزى أشيك ولاخطيبها؟جوزى أرق فى معامله الأنثى ولاخطيبها؟نصيبه لايكون خطيبها احلى ولا اشيك ولا أرق من جوزى دى تبقى صبرت ونالت ....هى بنت الايه طول عمرها متقعش الا واقفه...حسره عليا اتدبست...حاسه انى اتسرعت فى الجوازه دى....لو كنت استنيت زيها كان يمكن أتجوز جوازه حلوه زيها ................أاااااااااااااااه يانارى يابختتتتتتتتتتتتتتتتتتك بخطيبك،وأنا اللى فاكره نفسى ناصحه انى اتجوزت قبلك وقال ايه بغيظك.........أتاريكى بترتبى عشان تتجوزى الأحسن منى...))

وبدأت العمل على قدم وساق عشان أفرسهم وامهدلهم انى قررت اعلان الحرب(الباااااااااااارده)

ولاحظوا انى عارفه ان بعد الجواز الرومانسيه بتكون (صفر) وبعد الخطوبه بكام شهر بتبدأ الخناقات عالعفش والنجفه ومشايه الحمام مين اللى هيجبها فالحياه مبتكونش وردى وردى

أما انا بقى فخطتى كالتالى.......

الفيس بوك يتملى قلوب حمرا وخضرا وصفرا وشويه اغانى رومانسيه من الجامده وكلمات من الكوبليه اللى (مفروض)انى عايشاه مع بسلامته

ده غير أكاونت الفيس بوك الجديد اللى اتفتح وببعت لنفسى منه هدايا تحت اسم(مادو)لو جدعين ابقوا اثبتوا انه مش بنت وطبعا محدش هيجرؤ يسألنى مين مادو ده ولو حد سأل يترسم على وشى ابتسامه (مسهوكه)مع رد بمنتهى الرقه بنظره حالمه للسماء(مادو؟وأسكت كده...دى ...صحبتى) وفيديوهات رقيقه يبعتهالى مادو ده غير كلام وحشتينى اللى كله لايوضح انه ولد ولا بنت (الغموض حلو برده عشان الحرب تبقى بحق وحقيقى)

وطبعا صحباتى هيتابعونى وهم متغاظييييييييييييييييين ومخنوقين من كم الرومانسيه اللى أنا عايشاها مع مادو اللى هم شاكين( بذكاءهم الخارق )انه ولد (وطبعا شكهم ده يسعدنى جدا مش عايزه حد يفهمنى صح أو ميفترضش سوء النيه فيا لأن ده ممكن يبوظ خطتى كلها)

وبكده أقدر أنام وأنا مرتاحه البال ومش حامله هم أى حاجه طالما ان فيه ناس متغاظه ومفروسه(بسببى)