يافرحتى بصاحبتى

صاحبتى وحبيبتى وأنتيمتى ..كل ده حلو أوى بس لما تيجى ترتبط تنسى كل ده وتتحول لانسانه تانيه أنا معرفهاش ،كنت دايما بحس ان يوم ما صاحبتى دى بالذات ترتبط هبقى أسعد واحده فى الدنيا عشان هحس ان أختى بترتبط وهتتخطب وهقف جنبها وأعمل معاها أكبر حركات الجدعنه وهنزل معاها فى كل مشاويرها اللى قبل الخطوبه وهشاركها فرحتها وتحسسنى انها متأكده انى هبقى فرحانه عشانها

لكن اللى حصل عكس كل ده تماما،لقيتها بتكلمنى فى يوم وعايزانى أوى فى موضوع مهم جدا وقابلتها لقيتها بتقولى ان فيه حد متقدملها وانهم يعرفوا بعض بقالهم فتره لكن أهلها مايعرفوش انه متقدملها وعايز يخطبها وانها بتحكيلى عشانها قلقانه من الموضوع وعايزه تعرف رأييى وعلى أساسه هتكلم أهلها

ناقشتها وفهمتها ان قلقها ملوش معنى طالما هو حد كويس واتمنيت لها السعاده وبعد كام يوم خرجت معاها حكتلى انه لسه ماكلمش أهلها عشان عمتها كانت مريضه وده وقت مش مناسب انه يكلم والدها فيه بس معرفش ليه من نظره عينيها حسيتها كدابه بس ضحكت على نفسى وطنشت وقولت انى أنا بس اللى شكاكه وفى نفس اليوم لقيتها بتكلم حد وهى بتقول(وأنتم بقى كويسين؟طيب الحمد لله ..أه أنا خارجه دلوقتى خلوا بالكم من نفسكم..وده على أساس انى هبله ومش فاهمه حاجه)بدأت أفهم انه ده الولد اللى هيرتبط بيها وبرده طنشت وقبل مانروح البيت بشويه لقيته بيكلمها(والمفروض كل ده ان أهلها لسه مايعرفوش يعنى المكالمات دى ملهاش معنى) وهى بتهزر معاه ومبسوطه جدا وولا قلقانه من الارتباط بيه ولا أى حاجه زى ماكانت مفهمانى ووقفت بعيد عنى عشان مسمعهاش بس أنا ركزت مع مكالمتها عشان محبش أكون هبله

ومن قبل ماتعرفنى بارتباطها بالولد ده بفتره وهى بعيده وومبشوفهاش كتير و خروجاتنا سوا قلت جدا ومبقتش تتصل بيا وبقيت كل فين وفين لما أعرف عنها أخبارها ودى المفروض انها أكتر صاحبه ليا وحتى لما بتصل بيها مبقتش ترد عليا ومتفكرش تتصل بيا حتى بعدين لما تشوف اتصالى بيها عالموبيل

وفجأه لقيتها بعتالى رساله تقولى انهم هيشتروا الدبل الاسبوع ده وطبعا ده معناه ان كل حوارها معايا عنه كان مسرحيه عشان تحسسنى انها مشاركانى فرحتها ولكن فى الحقيقه ان كل موضوعها كان شغال من تحت لتحت وبقاله فتره وأنا أخر من يعلم مع انى كان المفروض أكون أول من يعلم 

أنا مصدومه فيها وبدل ما أفرح عشانها حاسه انى كارهاها جدا ومتغاظه منها أوووووووووووى عشان المفروض انى أقرب صاحباتها مش عدوتها ومفروض تكون عارفه انى هفرحلها بس أنا دلوقتى مش فرحانه عشانها ولافرحانه أصلا وولا بتمنالها خير ولاشر حتى مش فارق معايا وده مزعلنى أكتر ان أكتر صاحبه ليا مش فارق معايا تنجح أو تفشل فحياتها ولاهفرح ولاهحزن عشان أى حاجه فحياتها


واحساس بيوجع أوى لما أحس انها أقرب حد ليا وكنت بحكيلها كل حاجه فى حياتى وحاليا المفروض انى أقعد أتفرج على حياتها من بعيد لبعيد زييى زى الأغراب عنها مفرقتش عنهم اى حاجه 

حقيقى يافرحتى بالصداقه وقال رايحه مع صاحبتى وجايه مع صاحبتى وقال أنا اللى كنت بقول دى الحاجه الوحيده اللى طلعت بيها من الدنيا وطلعت هى كمان مقلب ....والله حاجه تحزن