هو فيه كده ؟

من كام يوم كده وأنا بعمل عقبال عندكم وعند السامعين شوبنج  أهو قولت بقى أمنجه نفسى وأدلعنى شويتين بدل الكأبه اللى أنا فيها دى ومنها كمان أغلس عالبياعه لما الاقيها جايه تغلس عليا وتقولى  الجمله الشهيره :بتدورى على حاجه معينه؟وأنا بكل غلاسه أرد و أقولها :لا ،فتقوم هى تتغاظ منى بقى وتجز على سنانها وتبصلى شذرا وتمشى وقفاها يأمر عيش هع هع ببقى ساعتها فرحانه فيها أوى يمكن أكتر من فرحتى بفوز منتخب مصر على منتخب اسرائيل (ده لو لعبوا يعنى فى يوم ما)


المهم ...خرجت من المحل وبتلفت بعينى كده لقيت شاب أنيق جدا ووسيم أكتر من اللازم وسيم وسيم يعنى حاجه كده طول بعرض بارتفاع بوسامه بريحه بيرفيوم خرافيه متفهموش حاطين فيها أعشاب ولازهور ايه دى عشان تبقى ريحتها تجنن كده وكان كمان لابس جزمه لميعه من اللى كل البنات بتحبها  دى ووأنا ببصله كده ياجماعه رحت متنحه أى والله تنحت ...فاكرين فيلم تايتانيك لما جاك شاف روز لأول مره فتنح؟أهو بدل ما الواد الوسيم ابن الايه ده هو اللى يتنحلى أنا اللى كنت متنحاله


وسرحت بقى بخيالى وأنا متنحه برده نفس التتنيحه وفاتحه بوئى على أخره زى سيد قشطه كده وكأن الواد الوسيم الحلو ده هبط من كوكب أخر أصله وسيم بزياده يعنى أنا عشت كتير وقليل شوفت ناس فيها وسامه بس مش كددددددددده أصل مفيش كده


وعدى من جنبى وطبعا مكانش بيعاكسنى ولا أى حاجه ده متخلقش عشان يعاكس ده يتعاكس وبس ،هو عدى من جنبى لأن ده طريقه مش أكتر للأسف يعنى فأنا رحت باصه الناحيه التانيه بمنتهى الألاطه لأن طبعا وزى منتو عارفين أنا مش هاممنى لا هو قمرررر ولافظيييييع ولا أى  حاجه وأنا ببقى مارلين مونرو وقت ما أهتم بنفسى بس النفس بقى


وحاولت  أستكمل حياتى وأستكمل رحله الشوبنج وأشيله من دماغى عشان أنا بعد اللى شوفته ده مينفعش أرجع بيتنا وأبص فى المرايا دى تانى وأقول انى حلوه وأجنن ومفيش منى لأنى بعد ماشوفت الكائن ده لو بصيت فى المرايا هحس على رأى اللمبى انى حيييوان


وبدأت أتخيل ازاى الكائن الخرافى اللى من كوكب أخر ده ممكن يتجوز  أصل مش ممكن يلاقى حتى ملكه جمال العالم بالجمال ده وبعدين دايما البنت بتختار الراجل اللى شبه القنفد وتتجوزه عشان تفضل فى عين الناس قمر (ده بالنسبه للقنفد اللى متجوزاه)وتفضل فى عينه كمان أجمل نساء الكون  لأنه محصلش ربع جمالها ويفضل يبوس ايده ويشكر ربنا انها رضيت وتنازلت واتجوزته وبعدين لما يكون العريس شبه القنفد بيبقى مستحيل بنت تحاول تلطشه منها أو تبصله باعجاب لأنه فى النهايه قنفد،لكن ده ازاى واحده هتتجوزه وتمشى جنبه كده عادى؟


وبعدين جت فى راسى فكره تانيه وهى انى لو متجوزه كائن فضائى زى الأخ ده هفضل بقى أجرى وراه فى كل حته وأحلّق عليه أحسن واحده تلهفه منى أو هحبسه فى قفص الأرانب أحسن يهرب ولايفكر فغيرى بجماله الفتاك وطبعا حد بالوسامه دى أكيد هيستغلها فى انه يصاحب الالاف مهو وسامته مساعداه بقى


المهم بقى استكمالا للشوبنج نزلت أشترى شويه حاجات من السوبر ماركت  وسبت السوبر ماركت كله و برجع بضهرى كده رحت دايسه على رجل بنى أدم  وقبل ما أفكر الف وأعتذرله خرمت ودنى كلمه( أنتى عميا ولا ايه؟) ،رحت لافاله كده وببص لقيته...........الكائن الفضائى الوسيم
رحت مشمره أكمامى بقى وقايلاله: عميا؟؟اسماله عليك ياللى ماشى مفتح أوى ده أنت محتاج يعملولك عمليه فعنيك وظبط زوايا عشان تعرف تركز فى طريقك وأنت ماشى مش ماشى كده متبرمج زى الانسان الألى ، قال عاميا قال سبنالك الشوف يابوعنين شبه عنين الغراب متجيبش الا الخراب واديته وصله ردح أصيله وفى الأخر ياجماعه حسيت انه مش من مستوايا وانه عادى يعنى لاخرافى ولاحاجه...ولا ايه؟