رجل للايجار

الجو البرد ابن اللذينا ده بيخلى التهييس يتفتح على مصرعيه ووأنا قاعده كده متكتكه ومتلجه ولابسه زعبوط على دماغى وبلوفرات وبنطلونات وبيجامات فوق بعضها وشرابات ولكاليك  ...المهم يعنى انى فى ظل الأجواء دى كلها وأنا قاعده كده ببص للسقف ومحدش يسألنى كنت ليه ببص للسقف أهو كنت بتأمله وخلاص بسلى وقتى يعنى  لقتنى كده انى مفتقده الرومانسيه وانى عايزه حد كده يفضل يحبنى ويدلعنى ويعيشنى على حب فحب ويجيلى تحت العماره اللى أنا ساكنه فيها الساعه 4 الفجر ويقولى انى وحشته وانه ماعرفش ينام الا لما يجى ويشوفنى وأنا أطل من الشباك عشان ينال نظره واحده منى بنظراتى الساحره زى ما أنتم عارفين ومحدش برده يسألنى اشمعنى 4 الفجر بس شفقه منى واحسان عليكم وده كتر خيرى طبعا وكرم أخلاق عظيم منى هقولكم اشمعنى 4 الفجر

لأن ده المعاد اللى مشاعرى فيه بتبقى مرهفه ومتأججه(حلوه متأججه دى متنكروش) وببقى ضعيفه ضعف الصرصار قدام عجينه الصراصيروبيتهيالى ساعتها ان لو سحليه عدت من قدامى وقالتلى بحبك هنتمى فورا لعائله السحالى وهتبرى من البنى أدمين نهائيا

وعشان كده يا أعزائى فكرت تفكير تهييسى ملوش أى علاقه بالواقع وده للأسف يعنى واتمنيت لو أن يكون فيه راجل للايجار 

زيه زى شقه للايجار وعربيه للايجار وصدقونى كنت هستخدمه استخدامات بريئه جدا مش من الأفكار السودا اللى أنتم فهمتوها  

تصحى من النوم كده مكتئبه وعايزه رومانسيه تتصلى بشركه تأجير الرجاله يبعتولك راجل فول اوبشنز ودى بتشمل شياكه وقدره وابداع على الاحتيال عشان يحسسك وأنتى معاه انك الأولى والأخيره فى حياته (مش انه أول مايرجع الشركه ممكن تلاقيه متأجر لجارتك اللى فى الشقه اللى جنبك لزق) وبتكون شامله الشعر المتسبسب وضمانه انه يكون مستحمى وهو جاى فى يوم اللقاء يعنى مش مستحمى من 3 شهور ويجى يقرفك فى الحب وسنينه وشامله انه يكون حاطط بارفان من ماركه بنت ناس أوى وجزمه بتبرق زى المرايا وتلبسى أنتى بقى اللى عالحبل وتحطى ورده فشعرك وتمثلى قدام المرايا كتير دور الرقه اللى هى طبعا مش عندك أصلا بس أهو يوم ويعدى

والشركه دى بقى عشان اليوم ده يبقى يوم مميز فى حياتك بتحجزلك فى أفخم الفنادق مطعم كامل من بابه عشان سيادتك وهو تعيشوا أحاسيس الرومانسيه المرهفه (قال يعنى كأنه حجزلك المطعم ليكى لوحدك )مش ان كل التكاليف دى على حساب صاخب المخل اللى هو سيادتك 

وبتبعتلك الشركه مصور من تبعها يصورك أنتى والمحروس فى أرق لحظاتكم الرومانسيه عشان ياعالم هتشوفى الرومانسيه دى تانى فحياتك الحقيقيه ولالا أهو الصور والتاريخ يشهد على انجاز حصل فحياتك العاتفيه...وعلى رأى عمكم عمرو دياب لما قال (وأهو بكره نقول كانت ذكرى وعشنالنا يومين)ومن المؤكد انها هتكون ذكرى مش هتتكرر تانى أبدا ...حد فاضيلك يامه عشان يحجزلك ترابيزه فى فندق مش تقوليلى مطعم كامل وسلملى الفول والطعميه

ده غير بوكيه الورد اللى عمرك فى حياتك ماشوفتيه ولاهتشوفيه حتى لو اتخطبتى واتجوزتى الف مره اللى الشركه هتكون عاملاهولك عشان بسلامته يديهولك كهديه رقيقه قبل مايطلب منك بمنتهى الخجل (قال يعنى الواد وش كسوف) والجنتله والشياكه  وبعد مايبوس ايدك بمنتهى الرقه  انك تشاركيه الرقصه دى ....هااااااااااه مفيش أجمل من الأحلام

ولحد ماتفتح شركه الأحلام دى ولأنى مش هستخدمها برده حتى لو فتحت بحق وحقيقى هفضل أنا كده قاعده باصه للسقف عشان السقف ده طلع بيوحى بأفكار زى الفل