وحَشتنى ...وأوى

وحَشتنى ...الكلمه دى حلوه أوى حلوه بجد،حلوه لدرجه انى بيوحشنى أسمعها مِنى ،مهو مفيش حد أسمّعهاله ،مفيش حد أحسها عشانه،بس أنا حاساها  مش مهم خالص على فكره أنا حاساها تجاه مين بس هى حلوه أوى لما تتحس وبتوجع أوووووووى لما بيكون مفيش حد أقولهاله


أصل الكلمه دى جزء مننا بنحتاج حد يوحشنا بنحتاج حد نحس اننا محتاجين ناخده فى حضننا وننام و يحضننا بين دراعاته ويقول بطريقه حلوه أوى ورقيقه كلمه وحشتينى اللى تخلى الاحساس بالأمان يغمرنا،وحشتينى اللى من جوه أعماق القلب دى
بس خلصوا صح؟خلصوا اللى بيحبوا كده ويعشقوا كده ويفتقدوا كده.. خلصوا؟
بقوا وهم وأفلام وذكريات تتسجل فى تاريخ السينما بين فنان وفنانه (يعنى فى الاخر تمثيل)بس خلصت من حياتنا المشاعر دى؟


أنا مببقاش عارفه هى خلصت ولا بما اننا ماعشناش حياه حقيقيه من المشاعر فالمفروض نستناها يمكن تيجى


بس أنا عايزه (وحشتينى) مفتقداها مفتقده كم المشاعر اللى معاها مفتقده لمعه العيون اللى مع كلمه حلوه زى دى مفتقده دفىء الايدين ساعه اللقاء عشان القلب أصلا دافى من السعاده


وحلو الخيال على فكره لما يخلينا نتخيل حد من اختراعنا يحبنا كده ونوحشه كده ويفتقدنا أوى كده عشان احنا مش عارفين هيجى ولالا
بس لحد مايجى أنا عايزه أقوله :وحشتنى وأوى ومش عارفه لو بقيت معاك هفضل أعيط قد ايه فى حضنك عشان مش مصدقه انك موجود 


ياترى هتعرف تفك كلاكيعى؟وتعرف تحل الغازى؟وتصر عالحاجه اللى بقولك عليها لأ وأنت عارف انها من جوايا أه وأه جدا؟هتقرانى أوى كده؟وهوحشك وتفتقدنى وتخاف عليا؟
مش هنزل للواقع عشان الحلم ممكن يكون أجمل بس... وحشتنى