احنا سوا يمكن يكون أماننا ببعض

كل يوم ألاقى صاحبه جديده أعرفها بتتجوز ومنهم اللى متجوز من سنين ومعاه أولاد فى المدارس ومنهم اللى مخطوبه وفاضل لها كام شهر وتتجوز وأصبح عدد صحابى اللى مش مرتبطين يتعد عالصوابع ...الخوف بقى بيكبر والعمر بقى بيجرى واحنا مازلنا لوحدنا...طيب وبعدين؟؟لحد امتى هنفضل لوحدنا؟؟عملت المدونه يمكن الاقى اللى زييى ونواسى بعض فى وحدتنا بدل ما أهرى وأنكت لوحدى

عملت المدونه عشان احنا بجد محتاجين نفضفض  الموضوع مش موضوع بنات وبس الموضوع بقى أكبر من كده بكتير دى بقت مشكله شباب وبنات فى أعمار مختلفه بيعانوا من نفس المشكله وهى ....ان مفيش جواز...أيوه مفيش جواز

حولينا ناس كتير بتتجوز بس فيه غيرهم كتير جدا مش عارفين يتجوزوا ووصلت أعمارهم للأربعينات بدون جواز وبرده شباب وبنات مش بنات بس

المشكله بقى ان الراجل اللى داخل على أوائل الأربعينات بيدور على عروسه فى أوائل العشرينات طيب وبعدين.؟فيه جيل كبير أوى  من البنات أعمارهم وصلت ل30 سنه و40 سنه وبرده من غير جواز ،دول ينحرفوا ولا يعملوا ايه يعنى؟

لو كل راجل فكر بالشكل ده وانه عايز الصغيره وبس يعنى خلاص احنا كده هنبقى بجد بنضيع وكأننا خلاص بقينا متعلقين بين السما والأرض ،لا احنا فى أوائل العشرينات عشان تكون كل أعمار الرجاله بتدور علينا ولا احنا متجوزين كمان يبقى ايه الحل؟

أكيد مش هنقبل بأى حد يتقدملنا لمجرد ان عمرنا بدأ يكبر،بس مش هنكر اننا خايفين من الوحده...قصدى حاسين ان مجرد التفكير فى اننا ممكن يجى يوم ونكون لوحدنا..بطولنا..بدون راجل فحياتنا بيخلينا نحس اننا بنموت فى اليوم الف مره

طيب وأحلامنا والفارس أبو حصان ....للأسف بقت أشياء مؤجله فى حياتنا وياعالم هتفضل مؤجله لحد امتى

أسئله الناس والجيران وها ياحبيبتى مفيش حاجه كده؟بقت جمل مستفزه وجارحه فنفس الوقت وكأن الراجل ده هنزل أشده من قفاه عشان يجى يتجوزنى محدش بيقدر خالص ولابيراعى مشاعرنا وده غير الأفراح والستات اللى يكونوا ولايعرفونا ويفضلوا يسألوا وأنتى بقى مرتبطه؟طيب مرتبطتيش؟طيب ايه بقى بتشتغلى؟وفى الاخر برده ولابيحصل حاجه وممكن تكون اسئلتها دى تضييع وقت مش لسبب من اللى فدماغنا يعنى

جواز الصالونات بصراحه مبحبوش وبيخوفنى وفنفس الوقت الحب اللى بندور عليه ده هنلاقيه ازاى أو فين أنا معرفش

مش مهم ارتبطتوا قبل كده ولا لا مش مهم حبيتوا قبل كده ولا لا مش مهم حتى لو اتجوزتوا قبل كده وانفصلتوا لأنكم كده هتكونوا بتعانوا معانا من نفس الوحده بنفس تفاصيلها المهم انكم ماتكتبوش أى شىء هنا الا لو فعلا محتاجين تحكوه،محتاجين تخرجوه من قلوبكم وتنفسوا عن غضبكم وثورتكم

شاركونى برأيكم والمدونه مش للبنات بس طبعا لأن المشكله مش مشكله بنات وبس....احنا سوا هنتكلم ونشارك بعض بالرأى يمكن ده يصبرنا ويكون أماننا ببعض وبوقوفنا جنب بعض